Жанболат Мамай он жылға сотталуы мүмкін

Тіркелмеген Демократиялық партияның басшысы Жанболат Мамай қаңтар оқиғасына қатысты іс бойынша жауапқа тартылуы мүмкін.

– Бүгін Қылмыстық кодекстің екі бабы – ҚР ҚК 272-бабының 1-бөлігі (жаппай тәртіпсіздіктер) және 274-бабының 4-бөлігі (жалған ақпарат тарату) бойынша маған айып тағылғаны туралы білдім. Бұл мені қаңтар оқиғасы кезінде тәртіпсіздік ұйымдастырып, жалған ақпарат таратты деп айыптайды деген сөз, - делінген Мамай мәлімдемесінде.

Мәлімдеменің көшірмесін ҚазТАГ редакциясы жариялады. Саясаткер түсіндіріп өткендей, оған 4 қаңтарда «Алматы арена» жанындағы алаңда бейбіт митинг өткізгені үшін айып тағылған.

– Біріншіден, менің «Алматы аренада» айтқан сөздерімнің толық нұсқасы бар, онда ешкімді бір жерге баруға шақырмағаным анық естіледі. Керісінше, бәрінен ештеңені бұзбауды және полициямен қақтығыспауды сұрадым. Бұл бейне әлеуметтік желілерде жарияланған. Сонымен қатар, бірнеше минуттан кейін басқа бейбіт наразылық білдірушілермен бірге ұсталдым. Мен ешкімді алаңға апармадым. Екіншіден, мен жаппай тәртіпсіздіктерді қалай жалғыз ұйымдастыра аламын? Маған бағынатын «топ» қайда? «Ұйымның» нақты жоспары қайда? Мен мыңдаған құқық қорғау органдарының қызметкерлеріне қарсы жалғыз «Рэмбо» болып шықтым ба? -  деді ДПК көшбасшысы.

Оның айтуынша, «Жаңаөзендегі алаңда 10 мың наразылық білдіруші тұр» деген сөздер жалған ақпарат деп танылған. Саясаткер бұл хабарлама сол кезде БАҚ-та жарияланғанын айтты.

– Бұл қылмыстық іс оппозициялық қайраткерді саяси тұрғыдан қудалау, - деді Мамай.