Жаназада бір бума ақша шашу дәстүрде бар ма?

Әлеуметтік желіде жаназада мәйітті үйден шығарып жатқанда бір бума ақша шашқан бейнежазба тарап кетті, деп хабарлайды Orda.kz.

TikToK-та тарап кеткен бұл бейнежазбаны марқұмның жақындарының бірі жариялаған. Ол 1,7 миллион қаралым жинаған. Желіде желдей есіп кеткен соң, парақша иесі неге олай жасағандарын көпшілікке түсіндіруге тырысты. Себебі көпшілік бұл бейнежазбаны көргенде, надандыққа балап, оны дәстүрге де, шариғатқа да қайшы екенін жарыса жазды. 

«Сіздер дұрыс түсінбедіңіздер, әжеміз 103 жасқа келіп бақилық болды. Бір ғасыр жасаған адамды осылай шығарып салады. Әжеміздің өзінің өсиеті болған. «Артымнан ақша шашып шығарып салыңдар» деген. Дүниесіз келеміз, дүниесіз кетеміз деген мағынада»,– дейді бейнежзба авторы. 

Stan.kz-ке пікірін айтқан Ақмешіт Сырдария мешітінің наиб имамы Жақсыбек Әбиұлының айтуынша жалпы шашу деген нәрсе тойға тән, ал жаназада ондай нәрсе жасау оғаш қылық.

«Қай жасқа келген жақынымыздан айырылысақ та, бұл біз үшін ешқашан той болмақ емес. Шашу деген нәрсе – тойға тән дүние. Яғни, келін келгенде шашу шашады, қуанышта шашу шашады. Адам қаза болғанда шашу шашу дініміз де, дәстүрімізде де жалпы сау адамның ақылы оны қабылдамайтын дүние»,– деді наиб имам.