Жанар-жағар май ұрлығымен ұсталған депутат партиядан шығарылды

Атырау облысында жанар-жағар май ұрлығымен  ұсталған депутат Абзал-Сенбі Самалықов «Нұр Отан» партиясы қатарынан шығарылды.

Бірнеше күн бұрын Атырау мәслихатына «Нұр Отан» партиясынан сайланған депутат Самалықовтың жанар-жағар май ұрлығы бойынша ұсталғаны жария болған. Қазір депутат үйқамақта. 18 маусымда партияның Мақат аудандық бөлімшесінің саяси кеңесі отырыс өткізіп, депутатты партиядан шығару туралы шешім қабылдаған.

15 маусымда «Ақжайық» порталы депутатпен бірге тағы 22 адамның үстінен қылмыстық іс қозғалғанын хабарлаған. Ақпаратта  Ұлттық қауіпсіздік комитеті әуелі 20 адам үстінен «Ұйымдасқан топ, қылмыстық ұйым құру және оларға басшылық ету, сол сияқты оларға қатысу»  бабы (262-бап) бойынша қылмыстық іс қозғаған. Кейін «Сенiп тапсырылған бөтен мүлiктi иемденiп алу немесе талан-таражға салу»  (189-бап) бабы бойынша тағы бір қылмыстық табылған. Депутат осы  бап бойынша  күдікке ілінген.

Мақат станциясындағы тауар таситын вагондардағы цистерналардан жанар-жағар май ұрлады деген күдікке 23 адам ілініп отыр. Тергеу органдарының болжамынша, күдіктілер былтыр 31 маусым мен 31 қазан аралығында құны шамамен 20 млн теңге болатын 120 тонна жанар-жағар май ұрлаған.

Күдікке іліккен депутат  «Локомотив»  АҚ-ның Атырау қаласындағы бөлімшесінің директоры.