Жаңаөзендегі күн электр станциясының құрылысы 2025 жылы аяқталады

Жаңаөзендегі күн электр станциясының құрылысы 2025 жылы аяқталады, деп хабарлайды Orda.kz «ҚазМұнайГаз» ҰК» АҚ баспасөз қызметіне сілтеме жасап.

«Күн электр станциясын іске қосу 2025 жылдың III тоқсанына жоспарланған, ал газ және жел электр станциялары 2026 жылы пайдалануға беріледі» деп жазылған хабарламада. 

Жаңа нысан декарбонизация стратегиясын қолдау және көміртегі ізін азайтумен қатар, «Өзенмұнайгаз» АҚ мен «ҚазГПЗ» ЖШС секілді ҚМГ еншілес компанияларын тұрақты энергиямен қамтамасыз етуге мүмкіндік береді.

Мәліметке сәйкес, гибридті электр станциясының құрылысына шамамен 800 адам тартылған, ал нысан іске қосылғаннан кейін 70-ке дейін жаңа жұмыс орны ашылады.

Қазіргі уақытта газ электр станциясының құрылыс алаңында бастапқы жұмыстар аяқталған.

«Уақытша электрмен жабдықтау және вахталық қалашық орналастыру жұмыстары басталды. Алты қозғалтқыштың төртеуі зауыттық сынақтан өткізілді. Сыртқы инженерлік желілер бойынша жобалық-сметалық құжаттама әзірленіп жатыр. Күн электр станциясында 81,3 мың фотоэлектрлік панельдің монтажы аяқталды. Жел электр станциясы бойынша жел турбиналарын жеткізушіні таңдау рәсімі жүргізілуде» деп жазылған таратылған хабарламада.