Жаңаөзенде әкімдік алдында аштық жариялаған жұмыссыздарға айыппұл салынды

Полицейлер әкімдік алдында мұнай-газ саласына жұмысқа орналастыруды талап етіп, аштық жариялаған Жаңаөзеннің жұмыссыз тұрғындарын ұстады.

Қалалық әкімшілік ғимаратының жанына жиналғандарды арнайы жасақ қызметкерлері таңғы сағат бестер шамасында ұстады. Адамдарды автобустарға отырғызып, полиция бөлімшесіне жеткізген.

Белсенді Әсет Әбішевтің айтуынша, жұмыссыздарға қатысты әкімшілік іс қозғалып, оларға 110 мың теңге айыппұл салынды.

Бүгін Жаңаөзен әкімдігі наразылық акциясына қатысушылардың ұсталғанын растады. Алайда қала билігі олармен тек "профилактикалық әңгімелесу" жүргізілгенін мәлімдеді.