Жаңа жыл түні жедел жәрдем шақыру бойынша Алматы облысы көш бастап тұр

Соңғы тәуліктерде жедел жәрдем қызметін шақыру пультіне тұрғындардан 27 мың өтініш түсті. Олардың 17 мыңнан астамы бірінші-үшінші шұғыл санатқа жатса, төртінші санаттағы шақырулар бойынша жедел жәрдем бригадалары 10 мыңнан астам рет шыққан, деп хабарлайды Orda.kz. 

Денсаулық сақтау министрлігінің мәліметінше, ең көп шақыру Алматы облысынан түскен – 3073. Одан кейін Алматы қаласы – 2800 шақыру, Түркістан облысы – 2358 және Астана – 1942 жедел жәрдем шығуы тіркелген.

«Өткен жылдың 11 айында ел бойынша жедел жәрдем бригадалары 7,7 миллионнан астам шақыруды өңдеді. Оның ішінде 4,9 миллионы бірінші-үшінші санатқа, ал 2,8 миллионы төртінші санаттағы шақырулар болып, оларға емханалар жанындағы бригадалар қызмет көрсетті. Жалпы шақыру санының артуына қарамастан, жыл ішінде сәтті реанимация көрсеткіштері 7,1 %-ға өсіп, тіркелген жағдайлардың 51,7 %-ы болды»,  деп мәлімдеді денсаулық сақтау министрлігі.

Қазіргі уақытта ел бойынша жедел медициналық жәрдем қызметін 20 дербес станция, 98 қалалық қосалқы станция және 232 аудандық бөлімше қамтамасыз етеді, делінген министрлік хабарламасында.

Облыстық және қалалық жедел жәрдем станцияларында бір ауысымда 1 491 жылжымалы бригада жұмыс істейді, ал бастапқы медициналық-санитарлық көмек ұйымдарында төртінші шұғыл санатының шақыруларын орындау үшін 446 бригада қызмет атқарады.