Жаңа министр журналистерге кеңес беремін деп, сынға қалды

Төтенше жағдайлар министрі болып тағайындалған Шыңғыс Әрінов үкіметтің баспасөз орталығында журналистер сынына қалды, деп хабарлайды Orda.kz порталы.

Үкіметте журналистер жаңа министрден сауда базарларында не себепті өрт жағдайлары көбейіп кеткенін сұраған болатын. Алайда Әрінов бұндай жағдайды жоққа шығарды.

«Мұның бәрі біздің ашықтыққа бет бұрғанымызды көрсетеді. Біз 24/7 режимде телеграм арналарда төтенше жағдайларға байланысты ақпарат жариялап отырмыз. Біздің баспасөз қызметіміз тәулік бойы дағдарыс орталықтарында кезекшілік етеді. Сіздер қазір шынайы ақпарат көздерінен мәлімет ала аласыздар. Сол себепті телеграм-арналарда, БАҚ-та сондай әсер туындайды. Мен БАҚ-тан ұсақ өрттерді немесе кішігірім жайттарды жариялай бермесеңіздер деп өтінемін. Бүкіл елге оны жариялаудың не қажеті бар?» – деді ол.

Десе де, сұрақ қойған журналист “біздің не жазатынымызды, не жазбайтынымызды сіз айтпай-ақ қойыңыз, оны БАҚ-тың өзі шешеді” деді.

Алайда бұл ескертуге министр “тек кеңес ретінде айттым” деп, ағынан жарылды.

Еске сала кетейік, Семейде Ақ шың сауда орталығы 6 ақпан күні түнгі үштен бастап өртеніп, өрт сөндірушілер тілсіз жауды ауыздықтауға біршама уақыт жұмсаған болатын. ТЖМ кейін сол өрттің ықтимал үш себебін атаған.