«Жаңа адамдар» жалған анықтама сатқан елордалық жеке клиниканы әшкереледі

Екі ай бойы AntiLIPA азаматтық кампаниясының белсенділері Астанадағы Қаныш Сәтпаев көшесі, 13/3 мекенжайында орналасқан Ayana Clinic жұмысын бақылаған, деп хабарлайды Orda.kz.

«Жаңа адамдар» бұл мекемеде медициналық жабдықтың мүлде жоқ екенін айтады — тек принтер, кассалық аппарат және мөрлер ғана бар. Олардың айтуынша, мұнда кез келген анықтаманы бірнеше минут ішінде — ешқандай талдаусыз, тексерусіз және дәрігердің қарауынсыз сатып алуға болады. Белсенділердің бірі интернеттен жүктелген флюорография анықтамасын сатып алған.

AntiLIPA өкілдері клиникаға зертханалық талдаулардан өткізуге тиіс 150 құты әкелген. Бұл әрекет Ayana Clinic қызметін уақытша тоқтатуға себеп болды.

«Мұндай клиникалар, авто мектептер, университеттер — анықтама, сертификат не диплом сатып алуға болатын орындар — мәселенің себебі емес, салдары. Біз бәріміз адал дәрігерлердің емдегенін, сауатты мұғалімдердің оқытқанын, сенімді жүргізушілердің көлік жүргізгенін қалаймыз. Бірақ өзімізге айла жасау мүмкіндігі туған кезде — көп жағдайда сол мүмкіндікті пайдаланамыз. Жаңа Қазақстан жалған құжаттармен құрылмайды. Тіпті халықты алдай салу оңай болса да, барлығы — адал таңдау жасаудан басталады», — дейді «Жаңа адамдар» қозғалысының белсендісі Даниил Львов. 

Белсенділердің айтуынша, жалған анықтама — бұл жай ғана жүйені алдау емес, ол — адам өміріне тікелей қауіп. Мысалы, Ақтөбедегі көпсалалы балалар ауруханасында ашық түрдегі туберкулезі бар мейірбике жалған құжатпен жұмыс істеген.

Салдарынан 700-ден астам бала мен 55 қызметкер байланыста болғандар тізіміне енгізілді, себебі  олардың жанында қауіпті жұқпалы ауруы бар адам жүрген.