Жамбылдағы жол апатында 14 адам емес, 2 адам көз жұмған

Желіде Жамбыл облысындағы жол апаты түсіп қалған видео жаппай тарай бастады. Бейнежазба астындағы мәтінде «14 оқушының көз жұмғаны» туралы жазылған.

Бұл туралы Orda.kz хабарлады.

Облыстық полиция департаменті ақпаратты жоққа шығарды. 

– Айша бибі аумағында көкке шығып, қайтып келе жатқан 14 оқушы қайтыс болыпты. Ата-аналар чатына салыңыздар! Балалар ата-ана жанында болсын, - делінген жазбада.

Белгілі болғандай, апат 24 мамырда Айша Бибі ауылының жолында тіркелген. Бірақ онда ешқандайда 14 бала көз жұмбаған.

– Оқиға орнына келген полиция қызметкерлері Таразға қарай келе жатқан Mitsubishi Pajero көлігі BMW-мен соқтығысқанын анықтады. Жол апатынан BMW көлігінің 19 жастағы жүргізуші мен оның жолаушысы оқиға орнында көз жұмды, - деді полицейлер.

Сондай-ақ, 6 адам түрлі жарақатпен ауруханаға жеткізілді. 

Қазіргі кезде Қылмыстық кодекстің 345-бабы, 3-тармағы бойынша сотқа дейінгі тергеу басталды.