Жамбылда әкімдік жамағат салған мұқтаж жандардың баспанасын басқа біреуге берді

Жамбыл облысының имамдары халық қаржысына салынған үйлер мұқтаж жандарға емес, басқа адамдарға беріліп жатыр деп дабыл қақты.

31 арнаның хабарлауынша, көктемде қала әкімі Ержан Жылқыбаев мұқтаж жандарға жер бөліп, баспана салуға рұқсат берген. Имамдар еш ойланбастан үй салуға кіріскен, бірақ жарты жолда қаражаттары таусылып, жұмыс уақытша тоқтап қалған.

Мұқтаж отбасылар үйдің Жаңа жылға дейін берілетінін естіп, жан-жақтан ақша алып, қарызға батып, баспананы аяқтауға бар күштерін салады. Бірақ ақыр соңында олар тізімде болмай шығады.

Ақшасы ауаға кетті

15 жыл бойы бір пәтерден екінші пәтерге көшіп жүрген Фарида Жұмабаеваның айтуынша, ол отбасын жалғыз асырап отыр. Жұбайы екінші топтағы мүмкіндігі шектеулі жан. Балалары кәмелет жасқа толмаған. Фарида қиналған кезінде арасында мешіттен көмек сұрап жүрген. Бір күні имамның көмекшісі келіп, әкім асарлатып, жер бөлгенін айтқан. Үйдің құрылысын тезірек бітіру үшін Фарида жан-жақтан қарыз алған. Артынша әкім үйді тапсырғанда өзінің оның иесі емес екенін білген.

Фарида қазір 150 мың теңге несие төлейді. Бұйырмағанын біліп, ақшасын қайтарып алайын десе тағы болмаған.

«Қарыздарым төленбей ол жатыр. Жаздай тапқан ақшамды бала-шағамның аузынан жырып, күйеуімнің еміне қимай, баспаналы боламын деп осында ақшамды құйдым. Мен оны жайдан-жай беріп қоймаймын. Мен де баратын жерге барамын. Берілмеймін. Күресемін! Соңына дейін күресемін» деді Фарида.

Қала әкімінің рұқсатын алып, асар жасаған имамның көмекшісі Елдос Қырықбаев соңында шенеунік өзін алдап кеткенін айтады. Оның айтуынша, әкімдік мешіт ұжымы ұсынған тұрғындарға үй салуға рұқсат берген. Осылайша, мешіттің ұжымы адамдардан жылу жинап, құрылысты бастап кеткен. Жарты жолда жұмыс тоқтап қалған.

«Біреуден бес жүз кірпіш аламыз. Біреуден цемент аламыз. Біреуден тақтай аламыз. Әркімнен солай. Бізде мешітке «мә, саған» деп бере салатын жамағатты көріп тұрған жоқпыз. Ақырындап әйтеуір шамасы келгенше жамағат көмектесті. - Сол екі ортада әкімдік кіріп кетті ғой, иә? - Әкімдік мына үй неғып тұр, бітпесе біз бітіріп береміз деп орта белден кіріп кетті. Рұқсат сұраған жоқ» деп түсіндірді «Сары молла» мешіті имамының көмекшісі Елдос Қырықбаев.

Неге берілмеді?

Даудың басы әкімдіктің мұқтаж жандарға салынған үйлерін басқа адамдарға беруінен басталған. Үш отбасы Жаңа жыл алдында үйсіз қалды.

Жергілікті шенеуніктер үй салуға рұқсат берілгенін растады. Бірақ оны мешіттің ұсынған адамдарына беріледі деген сөз болмағанын алға тартты.

Тараз қаласы әкімінің кеңесшісі Зарина Қуатованың айтуынша, мешіттегі қызметкерлер маусым айында құрылысты жалғастыра алмаймыз деп әкімдікке шағымданған.

«Бірақ желтоқсан айында тұрғын үйлер тапсырылып жатқан кезде олардың уәде берген үш азаматымыз бар делінген хабарды айтты» дейді ол.

Қазіргі таңда асарлатып салынған үйге жеті мұқтаж отбасы кірген. Жыл соңына дейін тағы сегізі кіруі керек. Бірақ ол тізімде мешіттің ұсынған азаматтары бола ма белгісіз.