Жамбылда із-түзсіз жоғалып кеткен сарбазды тапқандарға сыйақы беріледі

Жамбыл облысында орын алған жарылыстан кейін жоғалып кетіп, әлі күнге дейін табылмаған әскери Бауыржан Дәуітбаевтың анасы ұлын тапқандарға сыйақы бермек.

Жарылыстан кейін із-түзсіз жоғалып кеткен Бауыржан Дәуітбаевты іздеу шаралары әлі де жалғасып жатыр.

Ұлының тірі екеніне сенім білдірген оның анасы «ұлын тапқандарға сыйақы беремін» деп мәлімдеді.

– Сіздерден көмек сұраймыз, қазақ елі! Көрген білгендіріңіз болса, хабарласуларыңызды өтінеміз. Сыйақысы бар. Жасөркеннен көрген бір-екі адам бар. Бірақ әлі нақты табылмай жатыр.  Жарылыстан елдің бәрі қашқан кезде бір жағына қарай шығып кетті деген ойдамыз. Содан «басына бір зақым келді ме?» деп ойлаймыз. Өйткені есін білсе, ол осы уақытқа дейін үйге оралар еді, - деді әскери Бауыржан Дәуітбаевтың анасы Фатима Ағыбекова.

Еске салсақ, 26 тамыз Жамбыл облысында жарылыс орын алды. Салдарынан 17 адам мерт болды. Оның ішінде ішкі істер органдарының қызметкерлері, әскерилер мен төтенше жағдайлар қызметінің өкілдері, әскери прокурор бар.