Жамбылда 7,5 млрд теңгелік жол жобасы тоқтап қалды

Жамбылда жол жөндеуге бөлінген 7,5 млрд теңгенің жобасы басталмай жатып, тоқтап қалды, деп хабарлайды Orda.kz. 

Бұл қаражат халықаралық көлік дәлізінің бір бөлігі «Ескі Күйік» асуының құрылысы үшін бөлінген. Ал тендерді ұтқан мердігер жұмыстың бар-жоғы 5%-ын аяқтаған. Тау ішіндегі тас жол жарты ғасырдан бері күрделі жөндеу көрмегені белгілі. Жүргізушілер жолдың шұрық тесік болып кеткеніне наразы. Ал бұл жолмен жеңіл көліктерден бөлек, транзиттік бағытта тауар тасымалдайтын еліміздің және сырт елдің жүк көліктері де жүреді екен. Күрделі жөндеу көрмеген автодәліз жыл сайын жамалады.

Тас жолмен тәулігіне 35 мың көлік қатынайтыны белгілі болды. Жолға жауаптылар 7,5 млрд теңгеге жаңғыртпақ болған. Осы жылы ерте көктемде құрылыс басталғанымен, соңына жетпепті. Тендер ұтқан компанияның техникасы түгел болмай, жұмысшылары да жетіспей, жоба тоқтап қалды. Ол жолдың тек 3 шақырымына ғана асфальттың астыңғы қабатын төсеген.