Қарағандыда дроперлікке банк шотын берген студенттер жауапқа тартылды

2025 жылғы 16 қыркүйектен бастап Қазақстан Республикасының Қылмыстық кодексіне 232-1-бап енгізіліп, дроперлік үшін қылмыстық жауапкершілік қарастырылған, деп хабарлайды Orda.kz.      

Қазыбек би атындағы аудан прокуратурасы Қарағанды қаласында екі тұлғаға қатысты Қылмыстық кодекстің 232-1-бабы 1-бөлігі бойынша мемлекеттік айыптауды қолдады.

Айыпталушылар орнында өз банк шоттарын үшінші тұлғаларға ақшалай сыйақы үшін берген студенттер болып шықты. 

Сот отырысында айыпталушылар кінәларын толық мойындап, жасаған әрекеттеріне өкініш білдірді. Олардың кінәсі ұсынылған дәлелдермен айқындалды.

Істі қарау қорытындысы бойынша сот айыптау үкімін шығарып, сотталушыларды кінәлі деп танып, айыппұл түріндегі жаза тағайындады.

Сот үкімі заңды күшіне енген жоқ.

Қарағанды облысының прокуратурасы банк карталарын, шоттарды және жеке деректерді бөгде адамдарға, тіпті «уақытша» немесе «қосымша табыс үшін» беру қылмыстық жауапкершілікке әкеп соғатынын ескертті. 

Дроперлік деген үшінші тұлғаларға өз банк шотына, төлем картасына немесе сәйкестендіру құралдарына заңсыз қол жеткізуге мүмкіндік беру, сондай-ақ оларды ақшалай сыйақы немесе өзге де мүліктік пайда табу мақсатында беру.

Бүгінде дроперлік интернет-алаяқтық схемаларының негізгі құралына айналды. Қылмыскерлер дроперлер шоттары арқылы ұрланған қаражатты қолма-қол ақшаға айналдырып, шығарып алады.

Оқи отырыңыз: 

• Әлеуметтік желіде желдей ескен «несиені кешіре салатын» ақпарат жалған 
• Қарағандыда алаяқ бәске тіккен 86 млн теңгесінен қағылды
• «Инвестор келіндер»: Алматыда қол жетпес алаяқ «күйеу жігітке» үкім шықты