Жамбыл облысының тұрғыны заңсыз алтын өндірді деген күдікке ілінді

Ұлытау облыстық полиция департаменті ұйымдасқан қылмысқа қарсы күрес басқарма қызметкерлері арнайы операция нәтижесінде Жаңаарқа ауданында заңсыз алтын өндірумен айналысқан қылмыстық топтың қызметін тоқтатты.

Polisia.kz дерегі бойынша, оқиға орнынан 23 адам ұсталып, оның ішінде Жамбыл облысының 29 жастағы тұрғыны жерасты «кәсіпорнын» ұйымдастырушы екені белгілі болды.

Күдіктілер құрамында алтын бар кенді ашық игерген, содан кейін оны ұсақтап, жуған. Оқиға орнынан полицейлер грамдық таразыны, ұсатқыш станокты, құрамында алтын бар 2 тоннадан астам кенді, шамамен 70 грамм алтынды тәркіледі.

« 7 арнайы техника – жүк көліктері, самосвалдар, экскаватор қамауға алынды. Сонымен қатар жауынгерлік патрондармен ату үшін қайта жасалған тапанша тәркіленді. ҚР ҚК-нің 295-1-бабы (Археологиялық жұмыстарды заңсыз жүргізу), ҚР ҚК-нің 287-бабы (Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру) және ҚР ҚК-нің 288-бабы (Салық салынатын кірісті азайту) бойынша сотқа дейінгі тергеу басталды. Тергеу әрекеттері жүргізілуде, олардың нәтижелері бойынша процессуалдық шешім қабылданады» деп жазылған хабарламада.