Жамбыл облысының орман шаруашылығында өрт шықты

Жамбыл облысындағы орман алқабында 2 мың гектарға жуық құрғақ шөп өртке оранды.

Бұл туралы төтенше жағдайлар департаментінің баспасөз қызметі хабарлайды.

4 маусымда күндіз «Қазавиаорманқорғау» РМҚК патрульдік тікұшағымен аэровизуалды барлау барысында Сарықоба орманшылығы  аумағындағы өрт анықталды.

«4 маусым күні сағат 16:20 шамасында Жамбыл облысы «Мерке» орман және жануарлар дүниесін қорғау мекемесіне қарасты Сарықоба орман шаруашылығы аумағында алдын ала болжам бойынша 1650 га аумақта құрғақ шөп пен бұталар өртенді. Кейіннен өрттің Луговое орман шаруашылығы аумағына өтіп кеткені белгілі болды» делінген хабарламада.

Төтенше жағдайлар департаменті елді мекендерге қауіп төніп тұрмағанын атап өтті. Өртті сөндіруге 240-тан астам адам мен 50 техника қатыстырылған. Тікұшақ әкелінді.

«5 маусымда таңертең өрттің жалпы 1800 гектар аумағы оқшауланды. Елді мекендерге қауіп жоқ» деп хабарлады Жамбыл облысы бойынша ТЖД.