Жамбыл облысында тыңайтқыш зауытын салу жоспарлануда

Жамбыл облысының әкімі Нұржан Нұржігітов «Аларко» түрік компаниясы өкілдерімен кездесу өткізді.

Жамбыл облысының әкімі Нұржан Нұржігітов Түркияның Alarko Holding компаниясы өкілдерімен кездесу өткізді, деп хабарлайды әкімдіктің баспасөз қызметі. 

Тараптар қалдықтарды өңдеу және ауыл шаруашылығы саласындағы жаңа инвестициялық жобаларды жүзеге асыруды талқылады.

Жамбыл облысында пайдалы қазбалардың орасан зор қоры бар екенін ескерсек, инвесторлар минералды тыңайтқыш шығаратын зауыт салуға мүдделі. Облыс әкімі қазіргі таңда агроөнеркәсіптік кешен саласында мемлекеттік қолдау шаралары кеңейтілгенін және жергілікті атқарушы органдардың қолдау көрсетуге дайын екендігін баса айтты.

Alarko Holding-тің  вице-президенті Шахин Аббас Alarko Holding Түркияда орналасқан танымал компания екенін атап өтті. Компания құрылыс, энергетика, жылжымайтын мүлік, инфрақұрылым және өндіріс сияқты бірнеше салаларда жұмыс істейді.

Бұған дейін түрік холдингі Қазақстанда 500 гектар жылыжай салуға дайын екені хабарланған болатын. Жалпы, алдағы 5 жылда компания еліміздің ауыл шаруашылығына 650 миллион долларға жуық инвестиция құймақ.