Жамбыл облысында полиция қызметкері көз жұмды

Жамбыл облысындағы жол апаты салдарынан бір полиция қызметкері қаза тауып, тағы біреуі ауруханаға жатыр, деп хабарлайды Orda.kz. 

Қайғылы жағдай кеше, 11 ақпан күні сағат 19.40-та «Алматы-Ташкент» автожолының 203 шақырымында болған. Volkswagen Passat маркалы автокөліктің жүргізушісі қарсы қозғалыс жолағына шығып, жол қозғалысы қауіпсіздігін қамтамасыз етіп жүрген патрульдік автокөлікпен соқтығысады. Апат салдарынан қызметтік көлікте болған екі полиция қызметкері түрлі жарақаттармен Қордай орталық аудандық ауруханасына жеткізілді. Алайда Жамбыл облысы ПД патрульдік полиция батальонының аға инспекторы Үшкемпір Абай жансақтау бөлімінде көз жұмды.

Полиция аға лейтенанты Абай Үшкемпір ішкі істер органдарында 2017 жылдың 14 желтоқсанынан бастап қызмет атқарған.

Жамбыл облысының полиция департаменті полиция қызметкерінің туыстары мен жақындарына көңіл айтты.