Жамбыл облысында өрт салдарынан екі кішкентай бала қаза тапты

Қайғылы оқиға желтоқсанның 2-нен 3-іне қараған түні Шу қаласында болды. Онда жеке үйлердің бірінде өрт шыққан.

Облыстық Төтенше жағдайлар департаментінің мәліметінше, тұрмыстық заттар мен жиһаздар жанып кеткен. Өрт 30 шаршы метр аумақты шарпыған.

«Өрт 00:10-да оқшауланып, 00:35-те «ӨСҚАО» ММ-нің күшімен (төрт қызметкер мен бір техника) ауыздықталды. Бірінші бөлімшенің келу уақыты 23:58 (қашықтық үш шақырым)» деп хабарлады облыстық ТЖД.

Өртті сөндіргеннен кейін өртенген үйден бес және екі жасар балалардың күйген денелері табылды.

Полицейлер оқиғаның мән-жайын анықтап жатыр.