Жамбыл облысында мердігер компания кесірінен малдар мертігуде

Үшбас ауылында су құбырын тартып жатқан мердігер қазған орға мал құлап, шыға алмай қалды.

Үшбас ауылының тұрғындары ауылға су құбырын жүргізген мердігер компанияға шағымдануда. Олардың айтуынша, мұның бәрі 1 шілдеде таңертеңгі уақытта болған. Таңғы алтылар шамасында адамдар малдарын өріске шығарады, бірақ кейбір малдарды қазу жұмыстарынан  кейін пайда болған шұңқырдан шығаруға тура келді. Енді ауыл тұрғындары малдың орнына техниканың, тіпті адамдардың өзі шұңқырға түсіп кетуі мүмкін деп қорқады.

«Мен мердігерді түсінбеймін: жұмыс неге дұрыс жүргізілмеген? Неліктен мен өз өмірімді қатерге тігуім керек? Неліктен мен шаруашылығым үшін алаңдауым керек? Ұлым үшін де, күнде аулаға кіріп-шығатын техника үшін де? Менің ұлым көлік жүргізеді. Ал егер де ұлым немесе  техника шұңқырға түсіп кетсе, кім жауап береді? Мен өтініп тұрған жоқпын, жұмыстың сапасын талап етемін. Қаржы мердігердің қалтасынан шықпайды, мемлекет төлейді», – деп күйінеді Кенжекүл Сәрсекова.

Әйел  мемлекет осы жұмыс үшін 220 миллион теңгеге жуық қаржы жұмсағанын анықтаған. Ол жұмыстың қалай болса солай  жүргізіліп жатқанына сенімді. Ал мердігер болса интернетте керемет атқарылған жұмыс туралы есеп жариялап үлгерген.

Orda.kz тілшісі мемлекеттік сатып алу порталын ақтарып, Үшбас ауылындағы су желілерін тартуға бөлінген қаржыны анықтады. Ашық мәліметтерге сүйенсек, «АлмазПроектСтрой» ЖШС-не ауылдағы су желілері құрылысына қадағалау жүргізу үшін 2 млн,  «АКГЕМ-СТРОЙ» ЖШС-не техникалық қадағалауға 5,4 млн теңге бөлінген.  

Су құбыры құрылысының өзіне шамамен 176,5 млн теңге бөлініп, бұл ақшаны «Әлем-құрылыс корпорациясы» ЖШС алған. Жұмысқа тапсырыс беруші «Сарысу ауданы әкімдігінің тұрғын үй-коммуналдық шаруашылық, жолаушылар көлігі, автомобиль жолдары және тұрғын үй инспекциясы бөлімі» коммуналдық мемлекеттік мекемесі екен.

Ауыл тұрғындарының арыз-шағымдарынан кейін облыс әкімдігі болып жатқан жайтқа қатысты әрекет жасауды бастады. Жамбыл облысы әкімінің кеңесшісі Нұр-Мұхамед Ниязбеков болып жатқан жайтқа құқықтық баға беру үшін өңірге комиссия жіберілді деп сендірді.

Автор: Исламбек Дастан