Жамбыл облысында мектеп оқушысын өлтіргендер 11 жылға сотталды

Мерке ауданы Сарымолдаев ауылында бір топ қатарластары 16 жасар жасөспірімді өлтіріп қойды. Оқушының басынан жез тұмсықпен (кастет) ұрып, ол оқиға орнында көз жұмды. Оны өлтірген кәмелетке толмағандар 11 және тоғыз жылға бас бостандығынан айырылды, деп хабарлайды Orda.kz.

Қылмыстық іс Жамбыл облысының қылмыстық істер жөніндегі мамандандырылған ауданаралық сотында қаралды. Айыпталушы орнында кәмелетке толмаған екі бала: Асланбек Серікбай мен Қуаныш Бегнәлі отырды. Оларға бұзақылық жасады және мектеп оқушысы Артём Садыковты өлтірді деген айып тағылды.

Кәмелетке толмаған сотталушылар мен Артём Садыков арасындағы жанжал 2024 жылдың мамыр айында болған. Іс материалдарына сәйкес, Асланбек Серікбай Қуаныш Бегнәлінің талабы бойынша жез тұмсықтармен қаруланып, Артёмның желкесінен ұрып, қашып кеткен. Алған соққыдан жеткіншек сол жерде көз жұмды.

Прокурор әрбір айыпталушыны тоғыз жылға бас бостандығынан айыруды сұрады. Зардап шеккен тарап бұл жігіттерді қатаң жазалауды өтінді. Олардың өздері кінәларын жартылай мойындады.

Қылмыстың бастамашысы болған Қуаныш Бегнәлі 11 жылға, Асланбек Серікбай тоғыз жылға бас бостандығынан айырылды. Сонымен қатар, сот әрбір сотталушының заңды өкілдерін жәбірленуші тарапқа 10 миллион теңге көлемінде моральдық шығын өтеуді міндеттеді.

Үкім заңды күшіне енген жоқ және оған шағымдануға болады.