Жамбыл облысында электр қуатының үзілуіне байланысты 10 пойыз тұрып қалды

Қияқты-Хантау учаскесінде қатты жел салдарынан (20 м/с дейін) жүк пойызындағы бос контейнер құлап кетті. Құлаған контейнер байланыс желісінің тірегін зақымдады.

«27 қараша күні таңғы сағат 09:07-де Жамбыл облысы Шығанақ-Шу учаскесінің Қияқты-Хантау асуында байланыс желісінде кернеудің болмауына байланысты жолаушылар пойызының қозғалысы тоқтатылды. Пойыздан құлаған контейнер байланыс желісінің тірегін зақымдады. Қаза тапқандар мен зардап шеккендер жоқ» деп хабарлады ҚТЖ баспасөз қызметі.

Оқиға бес жолаушы және бес жүк пойызының кешігуіне себеп болғаны атап өтілді. Шу стансасының жөндеу бригадасы таңертеңнен бері оқиға орнында жұмыс істеп жатыр. Ал күндізгі сағат екілер шамасында пойыз қозғалысы қалпына келтірілді.