«Жамбыл облысында босанған оқушы»: Қарындастарын зорлаған 2 ер адам сотталды

Жамбыл облысының Мойынқұм ауданында бауырының қызын 6 жасынан бастап зорлаған екі ер адам сотталды, деп хабарлайды Orda.kz. 

Зорлық көрген қыз қазір — 13 жаста. Қыздың әкесінің бауырлары 6 жыл бойы оны зорлап келген. Сотталушылардың бірі — 35 жаста, екіншісі — 37 жаста. Ағаларының зорлық көрсетіп жүргені қыз жүкті болғаннан кейін ғана белгілі болды.

Бала құқықтары жөніндегі уәкіл Динара Зәкиева бұған дейін қыздың жағдайы туралы баяндаған еді.

«Жақында мен Жамбыл облысына барып, көп жылдық зорлық-зомбылықтан кейін 13 жасында бала босанған қызды көрдім. Зорлық-зомбылыққа ұшыраған балалардың көбі оларға қарсы қылмыс жасалып жатқанын түсіне бермейді. Олар барлық отбасындағы балалар осылай өмір сүреді деп ойлайды», – деді Зәкиева. 

Жәбірленуші қыз оқыған мектеп қызметкерлеріне қатысты оқушының өмірі мен денсаулығының қауіпсіздігін қамтамасыз етпегені үшін қылмыстық іс қозғалды. Олар мектепке келіп жүрген жүкті оқушының жағдайына дер кезінде назар аудармаған. 

Бұған дейін заңгер Ләззат Рақышева жәбірленуші қызбен кездескенін, оның құқығын қорғайтынын айтқан еді. 

Сотта 13 жастағы қыздың құқығын Ләззат Рақышева, Айман Омарова, Ғалымжан Жолдасбаев қорғады. Заңгер Ләззат Рақышева Orda.kz тілшісіне іске қатысты пікірін айтты.

«Екеуі де қылмысын мойындады. Прокурор екеуіне 20 жылдан сұраған. Біз келіспедік. Соңғы зорлаған Нұрланов өмір бойына бас бостандығынан айырылды. Махамадиевке 20 жыл берілді. Нұрланов соңғы сөзінде «Мені өлтіре салсаңдаршы» деді. Істеген қылмыстарына өкініп отыр. Отбасылары болған. Қазір ажырасып кеткен», - деді заңгер.  

Ләззат Рақышева жас ананың психологиялық күйі нашар екенін айтты. Оқушы қыз өмірге қыз бала алып келген. Алайда сәбидің денсаулығында кінәрат бар екен.

Ләззат Рақышева Human Rights Lawyers қоғамдық қорының «One-Stop-Service - Бір қадам» жобасы негізінде жас қыздың құқығын қорғағандарын айтты. Бұл жобаны қолдап отырған ҚР президенті жанындағы әйелдер істері және отбасылық-демографиялық саясат жөніндегі ұлттық комиссия және «Азаматтық бастамаларды қолдау орталығы» екен.

Айта кетейік, Түркістанда 13 жастағы бала 2-сынып оқушысын зорлады деген күдікке ілінді.