Жамбыл облысында 68 адам қар құрсауынан құтқарылды

Өткен түнде облыста ауа райы күрт нашарлап, республикалық және облыстық маңызы бар бірнеше тас жол бірден жабылды.

Нақтыланған мәліметтер бойынша, облыс жолдарында 68 адам қар құрсауынан құтқарылды. Құтқарушылар түні бойы жұмыс істеді.

«11 ақпанда сағат 01:00-ден 06:30-ға дейінгі аралықта Күйік - Қарабастау - Қаратау және Қаратау - Жаңатас жолының екі учаскесінде қар құрсауында қалып қойған  12 автокөлік шығарылып, жақын маңдағы елді мекендерге жеткізілді. Құтқарылған адамдар  ішінде тоғыз бала бар. Құтқарушылардың жедел әрекетінің арқасында олардың ешқайсысына медициналық көмек қажет болған жоқ» деп хабарлады Жамбыл облысы ТЖД баспасөз қызметі.

Облыстың Төтенше жағдайлар департаменті тұрғындарға ауа райының нашарлағаны туралы SMS х арқылы хабарланғанын түсіндірді. Бірақ адамдар жол қызметкерлері мен құтқарушылардың ескертулеріне қарамастан, ұзақ сапарға шығып, салдарынан өздерінің және басқа адамдардың өміріне қауіп төндірді.

«Құрметті азаматтар, қолайсыз ауа-райында елді мекендерден тыс сапарға шығу қиындыққа әкелетінін еске саламыз. Ұзақ сапарды кейінге қалдырыңыз. Қажет болса, оқиға туралы дереу 101 және 112 нөмірлеріне хабарлаңыз. Қауіпсіздік ережелері туралы толығырақ DARMEN тегін қосымшасынан біліп отырыңыз»  деп еске салды ҚР Төтенше жағдайлар министрлігі.