Жамбыл облысында кімдердің марапат алғаны белгілі болды

Бүгін Тараз қаласы, Баласағұн мәдениет сарайында ел Тәуелсіздігінің 30 жылдығына орай салтанатты жиын өтті. Жиынның құрметті қонағы болып ҚР мемлекеттік хатшы Қырымбек Көшербаев қатысты.

Жиындағы алғысөзді Жамбыл облысы әкімі Бердібек Сапарбаев алып, өзінен кейін Қырымбек Елеуұлына сөз берді.

«Ғылыми техникалық кардиохирургия және трансплантология» орталығының директоры, дәрігер Сейітхан Жошыбаев 3 дәрежелі «Барыс» орденімен марапатталды.

Жамбыл облыстық сайлау комиссиясының төрағасы, зейнеткер Серғали Айдапкелов «Құрмет» орденімен марапатталды. Сондай-ақ, Байзақ ауданы әкімі Бақыт Қазанбасов «Ерең еңбегі үшін» медалімен марапатталды.

Жамбыл облысы Байзақ ауданының әкімі Бақыт Қазанбасов карантин кезінде 60 жасқа толған мерейтойын тойлағаны үшін шенеунік сын астында қалған болатын.

Еске салсақ, аталған факт бойынша Байзақ ауданының әкімі Б.Қазанбасовтан түсініктеме алынып, Жамбыл облысы әкімінің 2021 жылғы 3 тамыздағы №173-Ж/Қ өкімімен Б.А. Қазанбасовқа қатаң сөгіс түріндегі тәртіптік жаза қолданылды. Қазанбасовқа ҚР Әкімшілік құқық бұзушылық кодексінің 425 бабымен 87 510 теңге көлемінде айыппұл салынды.

Жамбыл облысы әкімі апаратының басшысы болған Қанатбек Мәдібектің әкесі Қайшыбек Мәдібек «Құрмет» орденімен, ал Жамбыл облысы мәслихат депутаты Досбол Жылқыбаевтың әкесі Мәлікомар Жылқыбаев «Ерен еңбегі үшін» медалімен марапатталды. Екі азаматқа ұсыныс білдірген Сарысу ауданы әкімі Марат Сұлтанғалиев.

Жиын аяғында «Talim TV» телеарнасының директоры Мұхамеджан Тазабек «Облысқа сіңірген еңбегі үшін» медалімен марапатталды

Автор: Исламбек Дастан