Жамбыл облысын еріген қар суы басты

Облыстың бірнеше ауданында таңертеңнен бері еріген суды сору жұмыстары жүріп жатыр.

Т.Рысқұлов ауданының тау бөктеріндегі ауылдардың бірін лайлы су басып қалды. Көшелер мен аулаларға су жайылып кетті.  ҚР Төтенше жағдайлар министрлігінің мәліметінше, тұрғын үйлер зардап шеккен жоқ. Қазір учаскеде 60 адам жұмыс істеп,  төрт мотопомпаның көмегімен сору жұмыстары жүргізілуде.

«Осындай жағдай Шу ауданында да бар, жергілікті атқарушы органдар мен төтенше жағдайлар өкілдері жұмыс істейді. Аулалардан су тартылып жатыр. Сарысу ауданында да ауладан су сору жұмыстары жүргізілуде. Барлығы бақылауда»  деп хабарлады ҚР Төтенше жағдайлар министрлігі.

Байзақ ауданының бір ауылында да көшені су басып, ауданның төтенше жағдайлар қызметкерлері құбырды тазалағаннан кейін су кетіп қалған. Төтенше жағдайлар министрлігінің түсіндіруінше бұл жағдай өткен түнде Жамбыл облысындағы жауын-шашын, қар мен жаңбыр салдарынан орын алған.

Қазгидрометтің хабарлауынша, 4 ақпанда Қазақстанның оңтүстігінде дауылды ескерту жарияланады. Жетісу, Алматы, Қызылорда, Түркістан, Жамбыл облыстарының кей жерлерінде қатты жаңбыр жауады.