Жамбыл облысы әкімдігінің қызметкері «кезексіз баспана рәсімдеймін» деген уәдесі үшін сотталды

Жамбыл облысында Қордай ауылдық округі әкімдігінің бұрынғы қызметкері Айман Асқар мен алматылық Аида Жанаева сотталды. Олар бірнеше жыл бойы адамдарға тұрғын үй алуға «көмек көрсетеміз» деп уәде беріп келген, деп хабарлайды Orda.kz. 

Тергеу дерегінше, 2019–2025 жылдар аралығында айыпталушылар тұрғын үйді кезексіз рәсімдеу, мүгедектік алу, балабақшаға орналастыру және «қорлардан қаражат шығарып беру» қызметі бойынша көмектесеміз деп адамданға ұсыныс жасаған. Жәбірленушілер оларға жеке куәліктерін, ЭЦҚ-ларын беріп, «қызметтері» үшін қолма-қол немесе онлайн аударым арқылы ақша төлеген. Алайда әйелдер алаяқ болып шықты. Олар алған қаражатты өз қажеттіліктеріне жұмсаған.

Алаяқтардың әрекетінен көпбалалы аналар, мүгедек балалары бар отбасылар және әлеуметтік осал топ өкілдері зардап шеккен.

Сот Аида Жанаеваны 4,5 жылға бас бостандығынан айырды. Алайда рақымшылық туралы заңға сәйкес жаза мерзімі 3 жылға қысқартылды.

Айман Асқарға бастапқыда 4 жыл жаза тағайындалып, кейін жаза 2 жыл 8 айға қысқартылды. 

Айта кетейік, Хасан Қасымбаевтың ісі бойынша апелляциялық іс Алматы облыстық сотында тіркелді. Бұл туралы сот кабинеті деректерінде көрсетілген.