Жалақының ЖІӨ-дегі үлесі талап етілетін 50 пайыздың небәрі 30 пайызын құрайды- Әшімбаев

Сенат спикері Мәулен Әшімбаев Қазақстандағы ұлттық мақсаттар мен міндеттердің орындалуын бақылау жөніндегі парламенттік комиссия отырысында елімізде жалақының жалпы ішкі өнімдегі (ЖІӨ) үлесі талап етілетін 50 пайыздың небәрі 30 пайызын құрайтынын айтты.

«Қазақстанда жалақының жалпы ішкі өнімдегі үлесі небәрі 30 пайыз болады. ЭЫДҰ елдерінде бұл көрсеткіш 60%-ға жетеді, бірақ жалпы халықаралық тәжірибеде бұл көрсеткіш кем дегенде 50%-болуы керек деп есептелінеді», - деді Әшімбаев. 

Оның айтуынша, елімізде гендерлік еңбекақы алшақтығы мәселесі де өзекті күйінде қалып отыр. Ерлер әйелдерге қарағанда орта есеппен 26,5%-ға көп жалақы алады, ал кейбір аймақтарда бұл алшақтық екі есеге жуық.

«Тұтастай алғанда, компания деңгейінде тұрақты дамуды басқаруда сұрақ көп. ESG принциптерін интеграциялау бойынша жетекші компаниялардың жартысында бұл салаға жауапты адамдар жоқ», - деді Әшімбаев.

Оның пікірінше, бұл тәсілдерді елемеу экономикаға, кәсіпорындардың беделі мен қаржылық тұрақтылығына және тұтастай алғанда елге көптеген тәуекел тудырады. Тұрақты даму саласын нығайтудың жаһандық үрдісі елдегі бизнестің жаңа талаптарға бейімделуін қажет етеді.