«Жала жабу» бабымен айыпталған журналистің адвокаты әкімшілік істі тоқтатуды сұрады

15 қаңтар күні Ақтөбе қаласының әкімшілік құқық бұзушылық жөніндегі мамандандырылған ауданаралық сотында қоғам белсендісі әрі журналист Асқар Ақтілеуге қатысты сот тыңдалымы жалғасты.

Ырғыз ауданындағы гимназия директоры Гүлжайнар Нұрманова журналисті «жала жапты» деп айыптайды. Сотқа мектеп директорының заңды өкілі келді. Өзі онлайн қатысты. 

«Өте ауыр тиді маған. Менің Еңбек заңына сүйеніп жасаған әрекетіме жала жапты. Қаншама публикация шығарды. Айналамның бәрі заңсыз әрекет жасаған сияқты көріп, кінәлады. Сол себепті моральді түрде соққы алдым. Абырой-беделім де түсті. Сол кезде жалғыз кінәлі мен болып қалдым. Маған үлкен зияны тиді жабылған жаланың. Ешқандай заң бұзылмады, заң аясында жұмыс істеді. Мөлдір  Ғапиз  жазбаша түрде «отбасы жағдайыма байланысты» деп рұқсат сұрап келді. Ал бүгін мен оны соттан көріп отырмын» деді мектеп директоры Гүлжайнар Нұрманова.

Сотқа екі тараптың өкілдері де дәлелдеме құжаттар тапсырды. Мектеп директорының заңды өкілі Ақтөбе облыстық еңбек инспекциясы жөніндегі басқармасының жұмыс беруші тарапынан еңбек заңнамасының сақталуын тексеруі нәтижелері туралы құжат, актілер, 19 дана скриншот, мектептің ішкі құжаттары, аурухана анықтамасын тапсырса, журналистің адвокаты іске қатысты аудио, видео дәлелдемелер жазылған дискті берді. Сонымен қатар Ырғыз гимназиясының кіші қызметкері Мөлдір Ғапизді куәгер ретінде сотқа  қатыстыруды сұрады. Сотта кіші қызметкердің жауабы тыңдалды. 

Сотта журналистің қорғаушысы тарсырған аудио, видео дәлелдер қаралды. Мектеп директорының заңды өкілі видеолар рұқсатсыз түсірілгендіктен іске тіркемеуді сұрады. 

«Менің қорғауымдағы Ақтілеудің Ырғыз аудандық гимназия директоры Нұрмановаға жала жапты деген деректерді анықтау мәселесін қарап отырмыз. Ол мәселе арызда жазылған, мән-жай көрсетілген. Арызды қарасақ, қорғауымдағы Асқар Ақтілеудің сторисінде Гүлжайнар Нұғманова жалған әрекеттер жасады деген дерек жоқ. Оған қарамастан полиция қызметкерлері 2024 жылдың 8-қаңтары күні сағат 20:46-да Әкімшілік құқықбұзушылық туралы хаттама толтырады. Қандай да болмасын жалған сөзді дәлелдейтін мәліметтер құқық қорғау органымен анықталған жоқ. Материалдық-құқықтық заңбұзушылық анықталмады. Асқар Ақтілеуов - журналист. Ол ақпаратты жеткілікті біліп, таратып отыр. Сондықтан Асқар Ақтілеудің әрекеттерінен әкімшілік құқықбұзушылық құрамының болмауына байланысты істі тоқтатуды сұраймыз» деді адвокат Қуанышбек Есенгелдин.

Айта кетейік, бұл оқиға Ырғыз ауданы гимназиясының кіші қызметкері Мөлдір Ғапиз жұмыстан шығарылған кезде басталды. Ол облыс әкімі Асхат Шахаровтың ауданға сапарында іштегі кемшіліктерді тізбектеп, бәрін журналистерге көрсеткен болатын.

Судья Гүлзира Ақмолдина журналистке қатысты сот процесінің ұйғарымы бүгін, 15 қаңтар күні сағат 17:00-де шығарылатынын хабарлап, үзіліс жариялады. Журналистің іске қатысты тұжырымы сол кезде тыңдалатынын айтты.