Жалған ақшамен жергілікті тұрғындарды алдаған жігіт сотталды

Қызылордада жалған ақша жасаған 35 жастағы тұрғынға қатысты сот үкімі шықты, деп хабарлайды ORDA тілшісі.

2019 жылдың қазан және 2020 жылдың ақпан айлары аралығында өзінің заңсыз әрекетімен алаяқ қолдан жасалған жалған ақшаны сауда орындарында өткізумен айналысқан. Қауын сататын базарда, әртүрлі азық-түлік дүкендерінде бірнеше мәрте 5000 және 10000 теңгелік жалған банкноттармен сауда жасаған. Әдетте ол өзінің әрекетін кешкі және түнгі уақытта жүргізіп келген.

Бұл жөнінде алаяқтың арбауына түскендердің бірі полиция қызметіне шағым түсірген. Оған күдікті азаматты Қызылорда облысы бойынша экономикалық тергеу департаменті қызметкерлері анықтады.

Қызылорда қалалық №2 сотының үкімімен ол ҚР Қылмыстық кодексінің 231-бабының 2-бөлігінің 2) тармағымен (жалған ақшаны сақтау және бірнеше рет өткізу) кінәлі деп танылып, 5 жылға бас бостандығынан айырылды. Жәбірленушілерге келтірілген шығындар мүліктік залал ретінде сотталушыдан өндіріледі.