Жалға берілетін тұрғын үйді субсидиялау қашан іске қосылатыны белгілі болды

Қазақстанда жалға берілетін тұрғын үйді субсидиялауға өтінімдерді қабылдау сәуір айында басталады, деп хабарлады индустрия және инфрақұрылымдық даму министрі Қайырбек Өскенбаев.

«Біз өтініштерді 5 сәуірден бастап қабылдауды жоспарлап отырмыз» деді Өскенбаев үкімет отырысында.

Оның айтуынша, 15 наурыздан бастап жалға берілетін тұрғын үйді субсидиялауға өтінімдерді қабылдаудың цифрлық платформасының сынақ нұсқасы пилоттық режимде іске қосылады.

«Платформа ЭСҚ арқылы өтінім беруді және өтініш берушінің талаптарға сәйкестігін автоматты түрде тексеруді қамтиды. Тексеру МКҚАЖ, Әділет министрлігінің, Мемлекеттік кірістер комитетінің, Білім және ғылым министрлігінің, Еңбек және халықты әлеуметтік қорғау министрлігінің Денсаулық сақтау министрлігінің мемлекеттік деректер базаларымен интеграциялау арқылы жүзеге асырылады» деді Өскенбаев.