«Жағдайы ауыр»: Мұхтар Шахановтың келіні мәлімдеме жасады

Ақын, қоғам қайраткері Мұхтар Шахановтың келіні Жаңагүл Мұратқызы әлеуметтік желіде тараған видеоға байланысты ашық мәлімдеме жасады, деп хабарлайды Orda.kz.

Жаңагүл Мұратқызының сөзінше, Мұхтар Шаханов денсаулығына байланысты айтқанын бір сәтте ұмытып қалады.

«Атаның қазіргі жағдайы өте ауыр. Айтқанын бірер минуттан соң ұмытып қалатын науқас хәлде. Жақында ғана екінші ұлынан айырылған адамның психоэмоционалдық жағдайының қаншалықты ауыр екенін біреу түсінеді, біреу түсінбейді», — деді ол.

Қазіргі таңда Мұхтар Шаханов қоғамда болып жатқан оқиғалардан мүлде бейхабар.

«Ата бүгінгі қоғамдық-саяси жағдайды толық түсініп, бағалап отыр деп айтуға келмейді. Сондықтан жұртшылықтан түсіністік пен тыныштық беруді сұраймын» деп жазды ол.

Сондай-ақ Жаңагүл Мұратқызы әлеуметтік желіде тараған бір видеоны негізге алып, ақынды қаралау мен ауыр сөздер айтуға ешқандай негіз жоқ екенін атап өтті.

«Ұлтына өлшеусіз еңбек сіңірген, ана тіліне өмірін арнаған адамды бір ғана видео үшін қарғап-сілеу — орынсыз. Мұхтар Шаханов өз ұлтының алдында адал перзенті болып, тарихта қалатын тұлға» деп жазды ол.

Мәлімдеме Шахановтың Конституцияға қатысты бейнежазбасынан кейін жарияланды.

Еске сала кетейік, Қазақтың белгілі ақыны, жазушысы, қоғам және мемлекет қайраткері Мұхтар Шахановтың ұлы қайтыс болғанын жазғанбыз

Оқи отырыңыз: 

• Мұхтар Шахановтың жұбайы өмірден озды
• Қазақстан Республикасының жаңа Конституциясының жобасы жарияланды
• Мемлекеттік кеңесші лауазымы жойылады, екі ай ішінде президент сайлауы өткізіледі