«Жабық ел»: Украиналық телеарна Түркіменстан билігінің ашуына тиді

Украинаның Freeдом телеарнасы эфирлерінің бірінде Түркіменстанның «жабық ел» екенін, желіге кіргенде шектеулер бар екенін айтты. Алайда Түркіменстан билігі бұл пікірге наразылық білдірді, деп хабарлайды Orda.kz.

Түркіменстан СІМ украиналық телеарнаға ресми жауап берді. СІМ мәліметінше, телеарнада айтылған сөздер «біржақты және шындыққа жанаспайды». Ведомство Freeдом арнасының журналистері елдегі нақты жағдай туралы білмейтінін мәлімдеді.

Сонымен қатар Ашхабад бұл украиналық телеарнаның алғашқы жалған ақпараты емес екенін алға тартты.

Түркіменстан билігі Украинадан мұндай жағдайлардың қайталанбауы үшін қатаң шаралар қабылдауды талап етті.

Еске салайық, маусымда Түркіменстанның сыртқы істер министрлігі Таяу Шығыста жағдай шиеленіскен соң, Иранда орналасқан шетелдік дипломаттардың, олардың отбасы мүшелерінің және басқа да азаматтардың елден шығуына көмектесетін және басқа да қолғабысты қамтамасыз ететін шараларды тез арада жасаған еді.