Жабайы Арман мен Қайрат Құдайберген рақымшылыққа ілінбейді

Рақымшылыққа сәйкес, сенаторлар 27 қазанда қабылдаған заң жобасына қаңтар оқиғасының 1,5 мың қатысушысы кіреді. Бірақ олардың қатарында Алматы қаласы мәслихатының экс-депутаты Қайрат Құдайберген мен кәсіпкер Арман Жұмагелдиев жоқ.

Бұл туралы Сенат отырысында Бас прокурордың орынбасары Әсет Шындалиев айтты. Қазір тәртіпсіздікті ұйымдастырғаны үшін 20 азамат жауапқа тартылуда.

- Ұйымдастырушыларға рақымшылық жасалмайды. Қаңтар оқиғасына қатысушылар ғана рақымшылыққа жатады. Тәртіпсіздікті ұйымдастырушылардың қатарында Қайрат Құдайбергенов пен Жабайы Арман бар, - деді Шындалиев.

Еске салсақ, 7 қаңтарда Алматы полиция департаментінің арнайы операциясы барысында ұйымдасқан қылмыстық топтың алты мүшесі мен Жабайы Арман ұсталған болатын. Оның қамауға алу мерзімі 7 желтоқсанға дейін ұзартылды.