Жақында азық-түлік тапшылығын сезінетін боламыз — Назарбаев

Жоғары Еуразиялық экономикалық кеңестің онлайн-отырысында сөз сөйлеген Нұрсұлтан Назарбаев ЕАЭО елдері азаматтарын азық-түлікпен қамтамасыз ету мәселесінде бірігуге шақырды.

Назарбаев отырыс барысында азық-түлікпен қамтамасыз ету мәселесіне ерекше назар аударды.

—  Азық-түлік туралы сөз қозғасам - қазір барлығы зардап шегуде, бірақ біздің одақ аумағындағы халықты азық-түлікпен қамтамасыз ету үшін барлығы бар. Тек соны дұрыс жоспарлап, дұрыс байланыстырып,  аумақта бар дүниені өзге елдерге жеткізу керек. Азық-түлік тапшылығын біз жуық арада міндетті түрде сезінеміз, - деді ЖЕЭК құрметті төрағасы Нұрсұлтан Назарбаев.

Бұған дейін Нұр-Сұлтанда Қазақстан президенті Қасым-Жомарт Тоқаевтың төрағалығымен Еуразиялық экономикалық одақ мемлекеттері басшыларының отырысы өтті.

Аталған іс-шараға ЖЕЭК Құрметті төрағасы,  Елбасы Нұрсұлтан Назарбаев, Ресей президенті Владимир Путин, Беларусь президенті Александр Лукашенко, Қырғыз республикасының президенті Садыр Жапаров, Армения премьер-министрі міндетін атқарушы Никол Пашинян, Еуразиялық экономикалық комиссия алқасының төрағасы Михаил Мясникович қатысты.

Отырыс барысында мемлекет басшылары ЕАЭО аясындағы ынтымақтастықтың басым мәселелерін талқылап, алға қойылған міндеттерді қарастырды.