Жаңатаста мерт болған бес баланың жақындары үндеу тастады

Жаңатаста оқыс оқиғадан көз жұмған бес бүлдіршіннің жақындары халыққа үндеу тастады. Олар мәселені ұшықтырмауды сұрады. Сонымен қатар, ешкімге кінә тақпайтындықтарын мәлімдеді.

Қоғамда осы мәселе талқыланған сайын ол ата-аналарына ауыр тиіп отыр. Қазаны қайта-қайта айтып, естеріне салған сайын бес перзенттің ата- анасына ауыр соққы болып отыр. Осылай деп қайғы жұтқан отбасы КТК телеарнасы арқылы бүкіл елге үндеу тастады.

Төрт күннен бері отбасы қайғыдан қан жұтып отыр. Әкімдікті кінәлап шаршаған олар кейбіреулер осы қайғыны арам пиғылдарына пайдаланып, жалған ақпарат тарата бастағанына ренішті. Осыған байланысты бес баланың туыстары халыққа үндеу жариялады.

Саидмұхаммед Әбдумәліков, марқұм балалардың туысы:

- Әлеуметтік желідегі анау-мынау деп, сан-саққа жүгіртіп, қитұрқы іс жасап жатқандарға да айтарым: тоқтатыңдар, осымен қоя қойыңдар. Біз соның бәрін естіген сайын жүрегіміз сыздап жатыр. Бізге берген көмектеріңіз сол болсын...

Өрттің себебі - балалар ойнап сіріңкемен от жаққан. Содан болып тұр ғой. Басқа – электр тоқ, газ, буржуйка деп, біреулер шығып жатыр. Оның бәрі өтірік. Бұдан былай ешкім бізді мазаламағаны, жағдайға түсінікпен қарағаны дұрыс. Бұл біздің бірінші әрі соңғы мәлімдемеміз болса, деген ойын білдірді.

Қазіргі таңда қайғыдан қабырғалары қайысқан отбасы психологтардың жіті бақылауында.