Жаңаөзенде жұмысшы тірідей өртеніп кетті

Жұмысшылары жалақының аздығына бірнеше рет шағымданып, еңбек жағдайын жақсартуды талап еткен «Кезби» ЖШС-нің 43 жастағы жүк тиегіш жүргізушісі қайтыс болды.

«14.06.23-50 Қарақия ауданы, Жаңаөзен қаласы, «ӨзенМұнайГаз» АҚ НГДУ-2 №49 топтық қондырғы аумағында № 9180 ұңғымасы жанған кезде АПРС-40 көтергіш қондырғысы өртенді. 15.06 күні сағат 00-51-де өрт сөндірілді. Өрт болған жерден жанып кеткен мәйіт табылды. Өрттің шығу себебі анықталуда» деп хабарлады Маңғыстау облысының Төтенше жағдайлар департаменті.

Марқұм 1979 жылы туған, Бейнеу ауылының тумасы. «Кезби» ЖШС-де жүк тиегіш машинисі болып жұмыс істеген. Жаңаөзен тұрғыны өз парақшасында қайғылы оқиға орнынан видео жариялады.

«Еңбек қауіпсіздігі сақталмайды, техниканың бәрі ескі, осымен Астанаға бардық, бірақ билік бізді тыңдамады. Соңында бәрі адам өлімімен аяқталды» деп жазды Нұрымұлы Нұрсұлтан.

«Кезби» ЖШС жұмысшылары былтыр және биыл көктемде бірнеше рет ереуілге шыққан. Компания басшылығы оларды сотқа беріп, ереуіл жарамсыз деп танылды.

Кейін «Кезби» ЖШС жұмысшыларының талаптарын орындағанын хабарлағанымен, 150-ге жуық адам ереуілдерін жалғастырды. Сондай-ақ, компания ереуілге шыққандардың орташа жалақысы 674 мың теңге екені туралы ақпарат таратты. Бұған ашуланған жұмысшылар бұл ақпаратты жоққа шығаруды талап етті.