Жаңаөзенде иттер 13 жасар қызды талап тастады

Қаңғыбас иттер 13 жастағы балаға шабуыл жасады, оқиға куәгерлері көмекке жетіп, иттерді қуып жіберді.

 Жергілікті «Лада» басылымының жазуынша, оқиға туралы жергілікті блогер Ақмарал Байбоз хабарлаған. Оның айтуынша, 13 жастағы қызға қаңғыбас иттер шабуыл жасаған. Жақын жерде оқиға куәгерлері көмекке жетіп, қаңғыбас иттерді қуып жіберген. Зардап шеккен бала ауруханаға жеткізілді.

— Балалар ғана емес, үлкендер де көшеге шығуға қорқады. Биліктен шара қолдануын сұраймын, - деп жазады блогер.

Жасөспірімге шабуыл жасаған иттердің ұсталғаны-ұсталмағаны әлі белгісіз. Биыл 2 наурызда Қазақстанда «Жануарларға жауапкершілікпен қарау туралы» заң күшіне енді. Жаңа ережеге сәйкес, айықпас дертке шалдыққан немесе қоғамға қауіпті иттерді ғана жоюға рұқсат етілсе, қалғандары міндетті түрде зарарсыздандыруға тиесілі.