Жаңаөзен мұнайшылары жоғары жалақы туралы ақпаратпен келіспейді

«Кезби» серіктестігінің ереуілге шыққан жұмысшылары компания басшылығының жалақының жоғары екендігі туралы мәлімдемесіне наразы.

Үш аптадан астам уақыт ереуілге шыққан мұнайшылардың айтуынша, 672,5 мың теңге жалақы туралы ақпарат шындыққа жанаспайды. «Кезби» ЖШС жұмысшылары компания басшылығына жарияланған жалақыны түсіндіруді талап етіп, өтініш білдірді.

Компания қызметкерлері басшылықтың жоғары жалақы туралы мәлімдемесіне ашуланған. Олар ереуілшілер мұндай жалақы алмайды деген уәж айтады.

Бұған дейін «Кезби» ЖШС атқарушы директоры Айгүл Өтешева БАҚ өкілдеріне кәсіпорын жұмысшылары орташа есеппен 672,5 мың теңге жалақы алатынын айтқан болатын.

Сәуірдің 19-ынан бері Жаңаөзендегі «Кезби» ЖШС жұмысшыларының ереуілі жалғасуда. Кәсіпорын қызметкерлері жалақыны көбейтіп, жұмыс көлемін азайтуды талап етуде. Олардың талаптарын жеткізу  үшін жұмысшылардың  өкілдері Қазақстан астанасына билікпен кездесуге барды.