Жаңа энергетика министрі Қазақстандағы атом электр станциясының құрылысы туралы айтты

Энергетика министрі Болат Ақшолақов Қазақстанда атом электр станциясының (АЭС) құрылысы туралы айтты.

«Атом электр станцияларын салу өте нәзік мәселе, сондықтан саламыз ба, салмаймыз ба, әзірге шешім жоқ. 2035 жылға дейінгі болжамдық теңгерімде әртүрлі мәселелер қарастырылған. Бүгінгі таңда жасыл саясат жүргізіліп жатқандықтан, шектеулер жасалып жатқанын білесіздер. Көмір өндіруді арттыра алмаймыз, өйткені ол экологиялық таза емес» деп түсіндірді министр.

Сонымен қатар, министр электр энергиясын өндіруге арналған өтпелі отын ретіндегі газдың таза екенін, бірақ оның қоры шектеулі екенін атап өтті.

«Сондықтан біз әртүрлі нұсқаларды қарастырып жатырмыз. Атом электр стансалары – қарастыруға болатын нұсқалардың бірі ғана. Бірақ бұл мәселе өте нәзік, ол бірінші кезекте қоғамды тарта отырып, барынша нәзік зерттеуді қажет етеді» деп қосты Болат Ақшолақов.

Еске салсақ, Болат Ақшолақов 11 қаңтарда Қазақстанның энергетика министрі болды.

Бұған дейін «Самұрық-Қазына» қорының басшысы Алмасадам Сәтқалиев Алматы облысындағы Үлкен елді мекені атом электр стансасын салуға барынша қолайлы екенін айтқан болатын.

2021 жылдың қарашасында президент Қасым-Жомарт Тоқаев Қазақстан атом электр стансасын салу туралы шешім қабылдауы керек екенін айтқан.