Зерттеу институты: Тәжікстан тәліптерден «Ансорулло жамағатын» құртуды сұраған

Швейцариядағы зерттеу институты Тәжікстан үкіметі мен "Талибан" ұйымы арасында жүріп жатқан құпия келіссөз жайында мәлімет жариялады, деп хабарлайды Orda.kz порталы Azattyk-қа сілтеме жасай отырып.

Бірінші кездесу былтыр 8 қарашада болған. Сол күні «Талибанның» Рахматулло Наджиб бастаған делегациясы Тәжікстанға құпия түрде келіп, келіссөз жүргізіп кеткен.

Тәжікстан тарабы бұл кездесуде «Ансорулло» мүшелерін Душанбеге экстрадициялауды сұраған. Алайда «Талибан» екі тарапқа кездесу ұйымдастырып береміз деген пікірге тоқтаған.

8 қаңтарда Озоди радиосының дереккөзі Тәжікстан үкіметі мен «Талибан» ұйымы арасында келіссөз болғанын растады.

«Ансорулло» ұйымын Тәжікстан азаматы Әміреддин Табаров құрған. Ол оппозициялық күштің бұрынғы командирі. Ол 1997 жылы азаматтық соғыс кезінде бейбіт келісімге келуден бас тартқан және Ауғанстанға кеткен. 8 жыл бұрын оның қайтыс болғаны хабарланды.

Осыған дейін Тәжікстан билігі бұл ұйымда кемінде 200-300 адам болуы мүмкін деп мәлімдеген.

SIGA мәліметінше, «Ансорулло» ұйымы Тәжікстанда ислам мемлекет құруды, Ресей әскерін тәжік аумағынан алып кетуді ұсынады. Сонымен бірге түрмелерден «Ансорулло» мүшелерін босатып, ислам медреселерін құруды талап етеді.