«Өзенмұнайгаз» мұнайшыларға жалақы төлеуге уәде берді

Компания жұмысшылар бастан кешіп жатқан электр қуатының тапшылығы шын мәнінде айтарлықтай емес екенін айтты.

Компания кен орнын электрмен қамту мәселесіне қатысты жағдайға түсініктеме берді. «Өзенмұнайгаз» АҚ ұңғымалар жұмысының тоқтап қалуы болмағанын, электр қуатының тапшылығы 7-ден  80 МВт екенін хабарлады.

«36 бөлімшенің 8-і тоқтады, 28 бірлік жұмыс істеп тұр. Ұңғымаларда электре жүйесі өшірілген жоқ. Барлығы қалыпты жұмыс істеп жатыр»  делінген компания хабарламасында. 

Мұнайшыларды алаңдатқан жалақы мәселесі де бөлек қозғалды. Компания тиісті қаржының барлығы төленетініне сендірді.

«Электр қуатының апатты сөндірілуі мұнай өндіруге кері әсерін тигізетіні сөзсіз, бірақ соған қарамастан жыл басынан бері «Өзенмұнайгаз» АҚ қызметкерлерінің еңбекақысы толығымен төленді, жұмыс орындары сақталды. Алдағы уақытта осындай қиындықтарға қарамастан қызметкерлердің жалақысын уақтылы және толық көлемде төлеу жоспарланып, бұл бағытта тиісті шаралар қабылдануда» делінген ресми хабарламада.

Бұған дейін мұнайшылар «Өзенмұнайгаз» жұмысын тоқтатқанын хабарлаған болатын. Олардың айтуынша, бұған электр қуатының жетіспеушілігі себеп болған.