Зеленский жасырын бункерге тығылды

Украина президенті Владимир Зеленский Ресей әскерлерінің Киевке жақындауына байланысты құпия бункерге тығылды.

Бұл туралы The Washington Examiner Украина астанасында жұмыс істейтін тілшіге сілтеме жасап жазады.

«Ол бункерде, біз оны жасырын жерде деп түсінеміз. Дегенмен Зеленскийдің өзі Киевтің орталық бөлігінде екенін айтады» деді тілші Мэтью Чанс CNN-ге Украина басшысы өз халқына кезекті бейне үндеуінен кейін.

Онда Зеленский Киевте өз халқымен қалғанын жариялап, өзінің басқыншылардың №1 нысанасы екенін айтты.

– Мендегі ақпаратқа сәйкес, жау мені бірінші нысана, менің отбасымды екінші нысана ретінде тандады, – деді Зеленский.

Еске салсақ, қазір Украина астанасының халқы үрей мен қорқыныш құшағында. Өткен түні Ресейдің зымырандары ел астанасына шабуыл жасады, ал өзге қалалардың тұрғындары техникалардың жедел түрде Киев бағытына беттегенін айтуда.

Қазіргі уақытта нақты ақпарат беретін орталық жоқ. Бүгін таңертең видеоүндеу жасаған Зеленский де Киевке шабуыл жасалу ықтималдылығының жоғары екенін, өзінің «нөмірі бірінші жау» екенін айтқан.

Ал телеграм-арналар сәт сайын «Киевте түсірілген» деген жазумен жарылыстардың, автомат дауысының видеоларын жүктеуде. Қазір Украина мен Ресей арасында қиян-кескі ұрыс жүріп жатыр. Қос тарап та тұтқындарды қолға түсіріп, олардың видеосын жүктеуде.