Зеленский УҚК басшысы Залужныйды ауыстыру туралы ойланып жатқанын растады

АҚШ-тың Киевтен Залужныйдың отставкаға кететіні туралы хабарлама алғанын 2 ақпанда WP және Reuters ақпарат көздеріне сілтеме жасап хабарлады.

Зеленский итальяндық RAI-ге берген сұхбатында алғаш рет бас қолбасшыны ауыстыру туралы ойлап жүргенін растады.

Украина президенті Владимир Зеленский елдің бүкіл әкімшілік аппаратына кадрлық жаңарту қажеттігін мәлімдеді, сонымен қатар Украина Қарулы күштерінің бас қолбасшысы Валерий Залужныйды ауыстыру туралы ойланып отырғанын растады.

Бұл туралы ол итальяндық RAI телеарнасына берген сұхбатында айтты.

«Қайта жүктеу және жаңа бастау қажет. Бұл бір адамға ғана емес, әскери саладағы ғана емес, бір топ басшыларға қатысты. Мен бұл ауыстыру (Залужный) туралы ойлап жүрмін, бұл рас» деді Зеленский.

Алдағы басшылықтағы өзгерістер туралы айта отырып, мемлекет басшысы Киевке «бір бағытта жылжып», «қайта іске қосылуы» және «жеңіске сенімді болуы» керектігін атап өтті.

Сол сұхбатында Зеленский қару-жарақ жеткізудің кешігуіне байланысты майдандағы «тоқырауға» назар аударды. «Жердегі жағдайға келсек, тоқырау бар, өйткені қару-жарақ жеткізуде кешігулер болды, бұл қателіктерге әкеп соқтырады», - деді мемлекет басшысы.
Залужныйдың жұмыстан босатылғаны туралы хабарламалар Украинаның телеграм-арналарында 29 қаңтарда пайда бола бастады. Сол күні кешке Интерфакс-Украина мен Censor.net ақпарат көздеріне сілтеме жасай отырып, жоспарланған отставка туралы жазды, бірақ Қорғаныс министрлігі мен президент кеңсесі Украина бас қолбасшының қызметінен босатылғанын жоққа шығарды.