Зеленский Путинге Украина жерінің қандай бөліктерін беруге дайын ?

Украина президенті Ресеймен бейбітшілік орнату мақсатында мүмкін болатын аумақтарды беру мәселесін талқылауға әзір екенін айтты, деп хабарлайды Orda.kz.

The Telegraph мәліметі бойынша, 15 тамызда Аляскада Дональд Трамп пен Владимир Путин арасында жоспарланған келіссөздер алдында Владимир Зеленский ұстанымын жұмсартты.

Бұған дейін ол ешқандай аумақты бермейтінін айтқан болса, қазір оны қарастыруға дайын екенін жеткізді. Алайда Ресей қазіргі уақытта басып алған жерлерден артық аумақ алмауы тиіс деген шарт қойды.

«Владимир Зеленский еуропалық көшбасшыларға, егер Дональд Трамп ұсынған келісім Украинадан қосымша аумақ беруді талап етсе, оны қабылдамау керек екенін айтты. Алайда Ресей қазіргі басып алған жерлерінің бір бөлігін өзінде қалдыруы мүмкін»  деп жазады The Telegraph батыс елдерінің келіссөзге қатысқан бір шенеунігіне сілтеме жасап.

Келісім майдан шебінде қақтығысты «тоқтату» және Ресейге Донецк, Луганск, Запорожье және Херсон облыстарының Ресей әскері бақылауында тұрған бөліктерін беру мүмкіндігін қарастыруы ықтимал. Сондай-ақ Қырым аннексиясын мойындау мәселесі де қарастырылуы мүмкін.

Еуропа көшбасшылары Трамп пен Путиннің алдағы келіссөздеріне алаңдаулы. Кремль Киевтің «толық капитуляциясын», оның ішінде Украинаның НАТО-ға кіруден бас тартуын талап етуді жалғастыруда. Ал Украина тек қауіпсіздік кепілдіктері бар елеулі бейбіт ұсынысты қабылдауға дайын.

Трамп бұған дейін Украина мен Ресей арасында аумақтарды «алмастыру» жөнінде келісуге тырысатынын мәлімдеген. Ол келіссөздің нәтижесін алдымен Владимир Зеленскийге, содан кейін ғана Еуропа Одағы көшбасшыларына хабарлайтынын айтты. ЕО өкілдері 13 тамыз сәрсенбі күні Трамппен кездесіп, екі жақтың келіссөздері алдында өз ұстанымдарын білдіруі тиіс.

«Киев қосымша аумақтан бас тарта алмайды, әсіресе Донецк облысының шығысында, өйткені бұл Ресей әскеріне 2014 жылы Донбаста соғыс басталғанда салынған қорғаныс шептерін айналып өтуге мүмкіндік береді» деп жазады The Telegraph.