Зейнеткер Ақтаудан Парижге велосипедпен бармақшы

Ер адам 5 мың шақырымды бағындыруды жоспарлап отыр, деп хабарлайды lada.kz. Бейнеу ауданының тумасы, 64 жастағы Раббым Борашев 26 шілде мен 11 тамыз аралығында Парижде өтетін жазғы Олимпиада ойындарындағы велошеруге бармақшы.

Ол зейнеткерлікке шыққанға дейін құрылыс саласында жұмыс істеген. Соңғы жылдары велоспортқа қызығып, бірнеше жарыстарға қатысып үлгерген. Парижге жету арнайы дайындықты қажет етеді. Жоспар бойынша Раббым жеті штаттың аумағын кесіп, 5 мың шақырымды басып өтеді.

«Олимпиадаға бару менің арманым деп айта аламын. Жас кезімде мүмкіндік жоқ еді, қазір уақыт келді. Алдымен Ақтаудан Бакуге барамын. Онда Қазақстан Республикасының Бас консулдығының өкілдері күтіп алып, Грузиямен шекараға дейін мені ертіп барады. Бұл мен үшін үлкен қолдау. Содан кейін мен Батумиге барып, «Ұлы далаға жорық» жобасына қатысамын. Маусым айында Түркияға кетемін. Венгрия, Австрия, Германия елдерін аралап, Францияға жетуді жоспарлап отырмын», - деп бөлісті жоспарымен Раббым Борашев.