Өзбекстандағы президент сайлауында Мирзиеевтің жеңіске жеткені рас па? – ОСК жауабы

Өзбекстанда президент сайлауы бес жылда бір рет өтеді. 2016 жылы 4 желтоқсанда Өзбекстанда кезектен тыс президент сайлауы өтіп, сол кездегі премьер-министр қызметін атқарған Мирзиеев жеңді.

Өзбекстан Орталық сайлау комиссиясы жексенбіде өткен президенттік сайлауда елдің қазіргі президенті Шавкат Мирзиеевтің 90 пайыз дауыс жинағандығы туралы ақпаратты жоққа шығарды.

Бұл туралы Orda.kz хабарлайды.

Бұған дейін Euronews телеарнасы жексенбі күні өткен президент сайлауы кезінде, алдын ала нәтижелер бойынша Мирзиеев 90 пайыз дауыс жинап, қайта сайланғанын хабарлаған.

– Өзбекстанда өткен президенттік сайлаудың алдын ала нәтижелері белгілі болды деген ақпарат таралуда. Біз бұл шындыққа жанаспайтынын хабарлаймыз, - деді ОСК өкілі Жалолиддин Усманов.

ОСК мәліметтері бойынша, сайлау учаскелері жабылған кезде сайлаушылардың белсенділігі 80,8 пайызды құрады, 16,037 миллион адам дауыс берген.  

Еске салайық, елді 1989 жылдан бері басқарған президент Ислам Каримов 2016 жылы 2 қыркүйекте 78 жасында инсульттан қайтыс болды.