Өзбекстанда коронавирустың британдық штамы тіркелді

Бұл туралы осы елдің Денсаулық сақтау министрінің орынбасары мәлімдеді. Мутацияға ұшыраған вирус 23 қаңтар күні Дубайға отбасымен бірге барып, демалып қайтқан ташкенттік 11 жасар қыздан анықталған.

Еліне қайтып келе жатып, әуежайда экспресс-тест тапсырғанда осындай жайт анықталған. Дереу жедел-жәрдем шақыртылып, қыз бала жұқпалы ауруханаға жеткізіліп, зерттеу жүргізілген. Дәрігерлердің мәліметінше науқастың жағдайы бірқалыпты. Қазір ауруханада емделіп жатыр. Бір айтарлығы оның жанұясының басқа мүшелерінен жаңа штамм анықталмаған.

Worldometer халықаралық статистикалық бюросының мәліметтері бойынша, Өзбекстанда осы уақытқа дейін коронавирустың 78 672 жағдайы тіркелді, 621 адам қайтыс болды, 77 146 науқас сауығып кетті. Жақында Түркияның Денсаулық сақтау министрлігінің басшысы Фахреттин Кожа коронавирустың «британдық» штаммы Түркияның 17 қаласында табылғанын айтты.

28 қаңтарда бұл мутация Австрияның Вена қаласынан алынған ағынды сулар сынамаларында табылғандығы туралы хабарланды. Бір күн бұрын коронавирустық инфекцияның «британдық» түрі әлемнің 70 елінде, «оңтүстік африкалық» 31-де анықталғаны белгілі болды.

2020 жылдың желтоқсан айының ортасында Ұлыбритания жаңа SARS-CoV-2 коронавирустық штаммы табылғанын жариялады. Елдегі жаңа және дамып келе жатқан респираторлық вирустық қауіптер бойынша консультативтік кеңес оның тез таралатынын және тұрғындардан сақтықты арттыруды талап еткендігін растады.