Өзбекстан Гүлнәр Кәрімованың мүлкін тауып, елге 141 миллион доллар қайтарды

Швейцария мен Өзбекстан келіссөздер жүргізіп, Гүлнәр Кәрімовадан тәркіленген ақша мен активтерді елге қайтару үшін Біріккен Ұлттар Ұйымының көпжақты трасттық қорын құру туралы шешім қабылдады.

Бұл туралы Өзбекстан әділет министрлігінің баспасөз хатшысы Севара Үрінбаева хабарлады.

Қорды Швейцария, Өзбекстан және БҰҰ өкілдері басқарады деп жоспарлануда. Ол Швейцария мен Өзбекстан арасында қалпына келтіру туралы келісімге қол қойылғаннан кейін өз жұмысын бастайды.

Сондай-ақ трасттық қор Швейцарияда Кәрімоваға қарсы әлі жалғасып жатқан қылмыстық процестің бір бөлігі ретінде болашақта тәркіленуі мүмкін «кез келген активтерді» қайтару механизміне айналады.

«Қор Өзбекстанның Тұрақты даму мақсатына қол жеткізуге үлес қосады. Ол Біріккен Ұлттар Ұйымының Өзбекстанға арналған тұрақты даму ынтымақтастығы негізіне (UNSDCF) сәйкес жобаларға ресурстар бөледі» деп атап өтті Әділет министрлігі.

Үрінбаева Өзбекстанға Франциядан тағы 10 миллион доллардың активтері қайтарылғанын айтты. Сондай-ақ Кәрімова мен оның сыбайластары АҚШ, Франция, Ресей және басқа елдерден алып кеткен қаражатты қайтару бойынша келіссөздер жалғасуда. Министрлік қазір шамамен 131 миллион доллар қайтаруға дайын екенін атап өтті.

2015 жылы тамызда Өзбекстанның бұрынғы президентінің қызы Гүлнар Кәрімова бопсалау және 2 миллиард долларға жуық салық төлеуден жалтару айыптары үшін 10 жылға сотталып, кейін бес жылға бас бостандығынан айрылды. 2020 жылдың наурыз айында Ташкент қалалық соты Кәрімованы қылмыстық қоғамдастық ұйымдастырды, бопсалау, ақша жымқырды, ақшаны жылыстатты деген айыптармен 13 жыл 4 айға бас бостандығынан айырды.

2020 жылдың ақпан айында Кәрімова Шавкат Мирзиеевке Швейцарияда бұғатталған 668 миллион долларды Өзбекстанға аударуды сұрап, оған қарсы істі жабуды сұраған.

2020 жылдың мамыр айында Өзбекстанның әділет министрлігі мен бас прокуратурасы Кәрімованың Франциядан 10 миллион долларға тең активтерін қайтарды. Сол жылдың қыркүйек айында Швейцария мен Өзбекстан Кәрімова ісі бойынша тәркіленген 131 миллион долларды қайтару туралы келісімге қол қойды.

2021 жылдың желтоқсанында Швейцарияның қылмыстық соты бұрын бұғатталған 70 миллион долларды Takilant Каримованың компаниясына қайтару туралы шешім шығарды. Өйткені тергеу бұл қаражаттың қылмыстық жолмен алынғанын растамады.