Өзбекстан елшісі: Нүкістегі тәртіпсіздіктер сыртқы күш әсерімен ұйымдастырылған

Өзбекстанның Қазақстандағы Төтенше және өкілетті елшісі Саидикрам Ниязходжаев Нүкісте ұсталған шетелдік азаматтар туралы және олардың алаңда «тектен-тек жүрмегенін» айтты.

Шенеуніктің айтуынша, Қарақалпақстанда болған жаппай тәртіпсіздікті сыртқы күштер ұйымдастырған. Нақты қай елдің азаматтары екенін тергеу құпиясына байланысты елші атамады.

— Жауапты органдар жүргізген алдын ала зерттеу нәтижесінде Нүкісте орын алған тәртіпсіздіктер сыртқы күш әсерімен ұйымдастырылғанын айта кету керек. Оқиғалар кездейсоқ орын алған жоқ және алдын ала дайындалған, - деді елші елордада өткен баспасөз жиыны кезінде.

Сонымен қатар, елші Өзбекстан мен Қазақстан шекарасында қалып қойған қазақстандықтар туралы да айтты.

— Біз соңғы күндері, 3-і мен 5 шілде аралығында, Қазақстан Республикасының өткізу пунктінде қалып кеткен азаматтарды шығардық, олар өз елдеріне оралды. Ол жерде әйелдер де болды, сыртқы істер министрлігі мен Самарқандағы ҚР Бас елшілігі жақсы жұмыс істеді, - деді ол.