Өзбекстан азаматы коронавирусты жоятын құрылғы ойлап тапты

Өзбекстандық өнертапқыш коронавирусты жойып жіберетін құрылғы ойлап тапты.

Бұл туралы Orda.kz «Хабар 24» сайтына сілтеме жасап хабарлайды.  

Олимжон Юсупов аппарат COVID-19-дың кез келген штамын бірнеше секундта өлтіре алатынын айтты. Мұндай құрылғыны жасап шығару үшін 1,5 жыл уақытын жұмсаған.

Бұл оның бірінші туындысы емес.  Олимжон Юсупов қазақстандық әріптестерімен бірге теңіз түбінен тарайтын зиянды заттарды жоятын арнайы қондырғы жасауға кіріскен. Бірақ жоспары пандемия салдарынан тоқтап қалған.

– Бұл – биогенетик қондырғы. Өзбекстан аумағында кең тараған. Біз бұл аппаратты соңғы 1,5 жылдың ішінде жасап шығарып, бірнеше зертханада сынақтан өткіздік. Коронавирустың кез келген штамын ауа кеңістігінде де, сұйық күйінде де 100 процент жоя алатындай жетістікке жеттік. Бұл қондырғы арнайы электрондар бөледі. Кейін олар вирусты қоршап, РНК-сын жеп қояды, - деді ол.

Бұл қондырғының әсер етуі туралы дәрігерлер оң пікір білдіріп отыр. Айтуынша, дәл осы қондырғының көмегімен құлан таза айығып шыққан науқастар да бар.

– Бұл аппаратты біз COVID-19 жұқтырған науқастардың палатасына қойғанбыз. Олар үш күннің ішінде түрлі препараттардың ғана емес, дәл осы қондырғының арқасында ауруынан құлан таза айығып шықты. Оның үстіне биогенетик құрылғысы қойылған зертханаларда қызметкерлердің вирус жұқтыру көрсеткіші де әлдеқайда азайды, - дейді вирусолог-дәрігер Мадина Шахмурова.